Awael News Magazine رئيس التحرير: عادل سميا
مقالات مشابهة
فرق كتير كبير بين انو نكون صناعيين وبين انو نكون تجار… بين الصناعة والتجارة فرق… الصناعة هي اللي بتصنع الشيء، اللي بتخلقو، اللي بتبدعوا، بينما التجارة هي بيع وشراء، وصفقات، وكونترا، وماديات، حتى الانسان بالتجارة بصفي مادي وسلعة…
واليوم، مش عم نصنع فن، ولا اعلام الو سلطة، لا ابدا، عم نتاجر بالفن،عم نتاجر بالاعلام، عم نتاجر بالمسلسلات، بالبرامج، بالفكر، بالشعب المشاهد، عم نتاجر ببعضنا… كلها عملية صفقات، بيجي الممثل بيلعب دور، ما بيندفعلو، بيطالب، بودّوه، بجيبو غيرو، بصير يصرخ بدو مصرياتو، منصير نصرخ معو، شوي بدقولو تعا عندك دور، بيرجع بروح بيمثل، وكمان ما بيندفعلو…
الاعلام والصحافة نفس التجرة، اكتب مقال دعم للعمل الفلاني، بيكتب، خود حق مقال جديد واكتب ضدو، بياخد وبيكتب، خود حق مقال لدعم حفلة تكريم، بياخد وبيكتب، شوي بيختلفوا عالدفع، بصيروا يكتبوا الضد ويهاجموا اللي كانو يقبضوا منو تحت عنوان ” الفضايح”، شوي بيشتريو غيرو، رد عليه،لأ والاحلى اكتر، تنين زملاء بيختلفوا بجرصوا بعضن، بتنقسم الصحافة شي مع هيدا وشي مع هيداك وبيهاجموا ع قد المصريات…
بالاذاعات، كل حزب عندو اذاعة، بدن يوظفوا كل انصارن، متخصص مش متخصص مش مشكلة المهم يتثبت ويقبض، وزيادة البرامج الهزلية السخيفة… بعدّ بعد صفقات التجارية او بوقف؟؟؟…
وبعد هيدا كلو شو بقلولك؟… الحق ع النقابة… انو انت برأيك النقابة جمعية خيرية؟… النقابة يا شباب ما بتنجح مسؤوليتها ع شخص النقيب (ة) وحده… كل اللي بتعانيه مرجعك نقابتك ان كنت فنان او اعلامي او صحافي… بس هيدي النقابة قبل ما طالبها بحقوقك بدك تكون قايم بواجباتك تجاهها… وما تقلي شو بتعمل النقابة؟…
بتفوق ع النقابة لما بتوصالوا ع سوريا ومصر ويطلبوا بطاقتكن… كيف النقابة بدها تجبلك حقك من المنتج؟ او مدير الاذاعة؟ او موقع او جريدة؟ اذا انت اشتراك سنوي ما بتدفع؟… وما تواخذوني بالكلمة اذا اجتمعنا زميليين لنتغدا شي نهار، مندفع غدا اكتر من اشتراك سنوي…
لما بصير كل واحد منا فاتح ع حسابو، وهمي الوحيد ذاتي وبس، وانا كون صف الاول، والشهرة والنجومية، لو ع حساب كرامتي وارادتي، ومبادئي، ساعتها مندخل باللعبة التجارية، ومنصير تجار عم نبيع هيكل الفن اللي صنعوا الكبار، وشوي شوي بهاللعبة منصير سلعة بتنشرى وبتنباع حسب الاعمال بايدين الرأسماليين… انت الله صنعك فنان لتصنع الفن وتأبدع، حرام نوصل لهون، ونصير عم نتاجر بالفن والابداع، والكرامات، والقيم… ونتاجر ببعضنا…
