Awael News Magazine رئيس التحرير: عادل سميا
مقالات مشابهة
بقلم الاخت ناي خوري
العوافي…
مسيرة إبداع رح نمشيها سوا… مسيرة خاصة بالمبدعين فقط، مبدعين الوسط الفني والإعلامي والصحافي… بالعربي الفصيح يعني ما بتشمل الدخلاء علو الوسَط… سوا رح نحوّل عملنا لرسالة، التمثيل الإخراج، الإنتاج، الغناء، الإعلام، الصحافة، نعم عملنا رسالة، رسالة مجتمع، رسالة هدفها توعيّة وتربية أجيال بيفتقد المجتمع والدولة تصنيعه، توعيّة من خلال رسائل مدروسة بتقاريرنا، بمقالاتنا، بمسلسلاتنا، بأفلامنا… رسالتنا هي إمتداد وإستمراريّة لإبداع المبدع الأوّل الله خالق الكون بجماله والإنسان بفكره والمبدعين بمواهبهم…
زميلي المبدع، موهبتك هي نعمة مجانيّة وهبها لك المبدع الأوّل، عطاك إيّاها لا لتتباها فيها ولا لتخبئها خوفاً من انك تفقدها… وهبك إياها لتكمّل رسالة إبداعه بخلقه، وهبك موهبتك وعطاك من إبداعه لتزيد الجمال على مسيرته الإبداعيّة وتكون شريك بالإبداع… سوا رح نمشي المسيرة لنكون عم نشغّل وزناتنا مواهبنا بالطريق الصحيح وما نسمح إنو تندفن تحت أيادي الرأسماليين…
كل واحد من مكانه منشكّل جماعة إبداعيّة بتسعى لإصلاح الوسط الفنيّ والإعلامي، سوا منكمل بعضنا متل أعضاء الفرقة الموسيقيّة ، من خلال دوركن بالوسط مهما كان بيكون نقطة بالإصلاح… كل واحد منكن هو نقطة تأثير ع كتار من الناس والزملاء، كل واحد منكن مهما كان حجمو هوي أساس بالفرقة، نحن منكمّل بعضنا، اذا حدا فكّر اذا ما عزف بالفرقة وبحسّ إنو ما رح يغيّر شي، بيكون وجوده كلّه ما الو مِعنى، أهميّتكن نابعة منكن كمبدعين، بتقدّموا شعوركن وقناعاتكن من خلال دوركن…
ما حدا يستهين بحاله أبدًا مهما كان دوره… تأثيركن هوي بعرّف عنكن… كلّ واحد حَبّْ الإبداع والفن بصدق هوي مسؤول عنه… زميلي المبدع، يا صورة الله المبدع الأوّل، إجعل من كلّ شي حسن متل ما رآه الله حسن جدًا بإبداعه بأيّام الخلق الأولى…
