Awael News Magazine رئيس التحرير: عادل سميا
مقالات مشابهة
اندريه داغر
فيروز عبالي احلم بعيدك ،،، بعيدك ال 81 عبالي احلم اني زرتك اني شفتك،،، اني التقيت فيكي وخبرتك قدي انا بحبك،،،قدي بحب صوتك الملائكي الفيروزي،،،قدي بحب ضحكتك ابتسامتك لفتت عيونك،،،خجلك،، ،رفعت ايدك ،،،والاكثر قدي بحب صوتك، وقدي بستمع لاغنياتك باوقات الحب الفراق الفرح الحزن البكي شو بيبقى من السهر شو بيبقى من الليل من الحب من الحكي من الضحك من البكي شو بيبقى من الرواية غيرك انت يا حبيبتنا يا فيروز ،،،
بدون صوتك ما بيبقى شي من هودي كلن ،،، اي عبالي احلم بعيدك ال81 انه تلفوني عم بيرن يطلع رقمك اسمع صوتك عم يعزمني ع بيتك ،،،عبالي اسمع عبر التلفون انه السيدة فيروز عاملة لقاء لاهل الصحافي من جيلنا،،،نطلع نقعد نحكي معك ندردش بأي كلام،،، ونتصور اي نتصور ليه لاء صورة عادي وسلفي كمان،،،
عبالي تخرقي كل البروتوكول المعتمدتي بكل حياتك وتقدميلنا نهار،،، يوم واحد بس نتصرف فيه ع راحتنا معك وانت تتصرفي فيه ع راحتك معنا،،،نقعد معك نعرف تفاصيلك،،،تفاصيل حياتك الصغيرة اليومية ،،،شو بتحبي شو بتكرهي من شو بتنزعجي،،،لمين بتحبي تستمعي ولمين ما بتحبي تستمعي،،،كيف بتمضي نهارك ومع مين،،،شو رأيك بالوضع بلبنان وبيللي عم بصير،،،ونرجع باخر هالنهار ع بيوتنا نفتح وسائل التواصل الاجتماعي تويتر وفايسبوك نشوف صورتنا مع صورتك ،،،
بتذكر مرة بس عملتي حفلة بالبيال،،،حاولت بكل جهدي اشتري بطاقة ومثل العادة “سولد اوت”،،،دقيت ع رقم بنتك ريما،،،كان الخط مسكر،،،بعتت رسالة ،،، ساعات قليلة بدق تلفوني :”الو اندريه داغر،،،معك مكتب السيدة فيروز،،،بطاقتك لحفل البيال موجودة عالباب اهلا وسهلا فيك “، كان معي يومها زملاء بالسيارة وكنت راجع من تصوير احد البرامج التلفزيونية صرت صرخ وما صدقت ويللي معي غارو مني وانا طرت من الفرحة وانبسطت،،، عبالي تتكرر الحالة نفسها واوقف امامك ولو لمرة وحدة بس،،،صحيح حضرت حفلة البيال وقبلها حفلة ساحة الشهدا ببيروت،،،ومرتين ببلاتيا ،،،بس الوقفة قدامك وجه بوجه الها غير طابع،،،غير نكهة،،،غير شي،،،شي ما بينوصف،،،
اي لي لاء خليني احلم انه نحن طلعنا ولو ليوم ع برجك العاجي،،،ع مملكتك السعيدة،،،
يا ريت ،،، يا ريت أنت ونحن بالبيت،،،
شى بيت أبعد بيت ،،، ممحي ورا حدود العتم و الريح ،،، و التلج نازل بالدني تجريح ،،، يضيع طريقك ما تعود تفل و تضل حدي تضل،،،
و يزهر و يدبل ألف موسم فل ،،، و تضل حدي تضل حدي تضل ،،، و ما يضل بالقنديل نقطة زيت،،، يا ريت الحلم بصير حقيقة ،،، يا ريت،،، !
الى فيروزتي
