Awael News Magazine رئيس التحرير: عادل سميا
مقالات مشابهة
بقلم الأخت ناي خوري
أصدقائي المنتجين وخاصةً الجداد اللي ققروا يدخلوا عالم الانتاج الدرامي والتلفيزيوني، لازم نكون متفقين إنو الدراما والبرامج ما بتبدا من عندك… وخاصةً اللي جايي جديد ومعو قرشين حلوين بدو يفعّلو بالوسط الفني والاعلامي…
بدخولك لازم تعرف انو انت مش مخلّص الدراما والتلفيزيون، ولا أعمالك هي قمة الابداع، لسببين واضحين: الاول، هوي إنو في زملاء الك بالانتاج بلشوا قبلك، وعندن خبرتن الكافية، ومسيرتن المهمة لوصلوا الدراما للي وصلتلو. تانيًا، ما في يكون عملك هوي القمة والا ببضل فيك تعطي أفضل منو… وكمان خلاص الدراما والتلفيزيون وتوجيهو، هوي بتكاتف الكل وبأعمال الكل وبإبداع الكل، وما حدا أفضل من حدا، لأن بكل فصل عنا أعمال سوبر ناجحة، وبعض الاعمال أقلّ نجاحًا…
ويا ريت، ما نعبّر انو في انحطاط بالدراما والتلفيزيون اليوم مقارنة مع الاعمال القديمة، لأن بالعكس اليوم الدراما بتقدّم كبير وجيّد وملحوظ بجهد منتجين كبار ومبدعين وتقنيين، نحن اليوم ما منعاني من انحطاط فني، بالعكس الاعمال اكتر من ناجحة، لكن منعاني من انحطاط أخلاقي بكواليس الاعمال، وعلاقاتنا ببعض، ومحارباتنا الخفيّة ع بعض، واهانة الزملاء الفنيين والتقنيين، وربط نجاح الاعمال بالابطال فقط…
سلامة فهمك نحن ما عنا انحطاط بالاعمال بل بآداب المهنة… وقبل ما تخبرونا بأوروبا وأميركا كيف بيشتغل الانتاج، ليش لتبعّد؟ تعا لخبرك بسوريا كيف بعاملوا الممثلين والتقنيين…الانتاج هوي باب النجاح، مسكتو المواهب، فتحتو المصاري، وعتبتو الآداب…
