Awael News Magazine رئيس التحرير: عادل سميا
مقالات مشابهة
بقلم الأخت ناي خوري
بستغرب تصرف البعض و الاكثرية من الفنانين وخاصةً المغنين اللي بخلّوا نجوميتن ترفع من أنانيتن وكبريائن… بيدّعيوا التواضع والعفوية بالمقابلات والمحادثات وبعاملوا الناس بتعالي وفوقية… ويا ريت هني بذاتن، بتقول يا خيي نجم، بدك رضى مدير الاعمال او عفوًا مدير مدير الاعمال ليردوا ع التلفون ويطبشوا بوجك كأنك عم تشحد منو… فنانين بيدّعيوا التواضع وع سوشيل ميديا بقضوها فنزاتي وأحبابي، وهني مقابلة لكشافة رفضوها قال مقابلة مش لمستواهم… انزلوا يا فنانين، يا ابني،يا بنتي، انزلوا وحطوا اجريكن للحظات ع الارض لفرجيكن الواقع، مش رح خبركن عنا نحن الشعب المعتر، رح نضل بالوسط الفني والاعلامي، انزلوا شوفوا زملائكن الممثلين والمخرجين كيف بيتبهدلوا ليعملوا اعمالن بالليل وبالنهار، البرد والشوب، وزملائكن الاعلاميين كيف بكون ع ارض الحدث تحت القصف وبالتلج وع الحدود وبالانفجارات لينقلوا خبر، وزملائكن الصحافيين اللي بينقلوا اخباركن بتتنبروا فيهن شمال ويمين كأن موظفين بمكتبكن… هيدا عدا فانزاتكن اللي عم يتخبطوا بتحديات الحياة وانتوا بتستغلوا محبتن لمحاربة بعضكن… انزلوا ع الارض وشوية تواضع، قبل ما تخبرني عن نجوميتك انت انسان، انسان مش مغيّير عنا، عن الناس… الفنان هو الانسان المبدع، وابداعك هوي انسانيتك واخلاقك وتواضعك… وبيوم الدين رح تقدم حساب عن نجوميتك، ونجوميتك هي انسانيتك مش كم غنية وفيديو كليب عملت… سعيدة
