Awael News Magazine رئيس التحرير: عادل سميا
مقالات مشابهة
اندريه داغر
صباح،،،اشتقنا !
صبوحة،كيفك من فوق، صرلك سنتين تاركيتنا، ما تفكري تاركيتنا بالنعيم لاء،انت بالجنة ونحن هون بعدنا على حطت ايديك،،ما تفكري تغير شي بلبنان يللي غنيتلوا من قلبك وحملتيه من خلال صوتك لكل العالم بالغرب وبالشرق،،،
من سنتين ،من بعد عيد ميلادك بكم يوم،بتاريخ 27 تشرين الثاني /نوفمبر 2014،مثل اليوم دقة الساعة حزن على رحيلك انت يا شمس لبنان ويا حلوة لبنان ويا ضحكة لبنان ،
من سنتين تمنينى ولاول مرة انه يكون خبر وفاتك شائعة من الشائعات الكتار يللي كانو ينتشرو عنك بهيديك الفترة،،بس ولا يهمك ما تفكري الاشاعات ما لاحقتك لفوق لمطرح ما انت،مبلى طلعت اشاعة بشعة مثل العادة عنك، بس ولا يهمك يللي بحبوك ما بصدقوا خرافات الكلام،،،
صباح الاسطورة،شمس الشموس، بعدك بقلبنا وببالنا،وبعدنا منسمع اغنياتك ومنرددها ومنغنيها ومنفرح عليها،،، وبعدك ساكنة بقلوب يللي بحبوك وهني كتار،وطالما الصباح بيشرق علينا كل يوم طالما انت ببالنا كل يوم،،،
صباح بتذكر قعداتنا سوى باوتيل كونفورت بالاول وبعدين باوتيل برازيليا،، وبتذكر كيف كنت تضللي تقوليلي “رجاع ضعاف لاخطبك،،انا ما بحب الناصحين” ونضحك سوى،،كيف كنتي تغنيلنا ونغني معك عالندا الندا ويانا يانا ويا لبنان دخل ترابك وشاهين شو جابك ع ضيعتنا ،،، وخبريتاك الحلوة عن رفيقة دربك فيروز، وعن الاتصالات يللي كانت تصير بيناتكن وكنت تقولي:” ما في احلى منها هالست،،هي سفيرة لبنان لكل العالم”، والاخبار عن رفيق دربك وديع الصافي وكيف كنتي تتمرني انت والصافي عالاغنيات وكيف كنتي تتباري معو عالمسرح بالرديات ،وعن وردة وفايزة احمد وسميرة توفيق وكل هالاكبار الباقيين والراحلين،،،
كنا ديما نزورك بالاوتيل،ولا مرة الا ما كنت الشحرورة صباح جمال وبهاء وريحة بتشق القلب وضحكة ما بتغيب عن وجك،،،ونقعد ونقعد ونسمع ونحكي ونضحك،،،حتى اخرى زيارة قبل وفاتك مش بكتير طلعنا وكان الغدا مجدرة،،، وقد ما انت ست ولايقة ومرتبة ومهفهفة طلبتي منا نضهر من الغرفة لتخلصي الغدا لان ما بتحبي يوشفك حدا الا بالصورة يللي عودتينا عليها،،،
صباح بغيابك انتخبوا رئيس للبلاد واقامو بعد غياب سنتين حفل عيد الاستقلال وببداية الاستعراض كرموكي وكرموا الموسيقار ملحم بركات،،، انبسطتنا بهالتكريم الرمزي بالعيد الوطني،،، وزعلنا كمان،،، زعلنا لانن نسيوا يكرموا وديع الصافي معكن،، وسعيد عقل والاخوين رحباني وفيلمون وهبي والاخوت شناي وغيرن وغيرن،،،بس ما فينا ننكر انها كانت لفتة ملفتة من قبل الدولة،،،
صباح اشتقنا واشتقنا كثير،،، صليلنا من فوق،،،
شو بدي اعمل قللي شو بخلي وشو ما بخلي وان كان بدك صليلك كل الصلاة رح صلّي ،،، ولما بتقشع عينيّ بتعرف اني عم صلّي،،،اي صبوحة منعرف انك عم بتصلّي ،،صليلنا،،،
