Awael News Magazine رئيس التحرير: عادل سميا
مقالات مشابهة
الاخت ناي خوري
العوافي…
بالمادة سبعة من الفصل الرابع بقانون نقابة الممثلين بيقول : ” يحقّ لكل عضو مضى على إنتسابه للنقابة أربع سنوات ويكون مسدّدًا بدل الإشتراك والإلتزامات الماديّة والرسوم المترتبة للنقابة أن يرشّح نفسه لعضويّة مجلس الإدارة.”… هيك القانون بيقول، بس يا تُرى كافي تدفع الإشتراك لتترشّح؟…
تعوا نحكي بالعربي الفصيح، تعوا نقرا بين الأسطر كلمات المادة، وبعدين منشوف مين في يترشّح وكيف فيك تنتخبو…
” يحق “…
١- ” لكل عضو مضى على إنتسابه للنقابة أربع سنوات”… شو معنى كلمة إنتساب؟ بالإسم فقط؟ في أسماء مسجّلة من سنين لكن ناسيّة وين مدخل النقابة… اللي بدو ينتسب للنقابة بدو يحمل هويتها، بكيانه وفكره وشعوره، الإنتساب هوي شعور الإنتماء، بيخلق مع موهبتك، بس وحدك اللي فيك تحافظ عليه… نحن بحاجة اليوم للشعور بهذا الإنتماء… الشعور بالإنتماء بيجعل العضو مخلص لعمله وواجباته، وبيتفانى بحبّ النقابة، وبيضحي من أجل مصلحتها، ومن أجل تحقيق أهدافها…بيجعل العضو ودود ومحبّ مع زملائه…بيجعلك تقدّم دايمًا الأفضل، بكبّر طموحك… بيخلق عندك حفظ الأمانة والصدق، واحترام القانون والمنهج المتّبع… الشعور بالإنتماء ما بيخليك تلقي اللوم على النقابة، وعلى ضعفها، لسوء حياتنا واحتياجاتنا، بحين اللوم لازم يكون علينا نحن، وعلى تصرّفاتنا تجاه النقابة، وع كل صاحب قرار ما أخدو، وع كل زميل متخلّي عن إنتمائه النقابيّ، وراكض وراء أطماعه والعملة والشهرة، مكتفيين بدور الرأسماليين على حساب دور النقابة… الشعور بالإنتماء بحسّسك إنو إنت المسؤول الأوّل عن ضعف النقابة…
٢- ” ويكون مسدّدًا بدل الإشتراك والإلتزامات الماديّة والرسوم المترتبة للنقابة”… ع حالة الماديّات رشّحوا المنتج بيربح بالتزكيّة… ما رح ندخل بسجال دفع الإشتركات عَ أمل تكون من أوّل نقاط البرامج المطروحة… بس رح نحكي إنو بس الإلتزامات الماديّة والرسوم المترتبة وحدها بتخوّل للترشّح لعضويّة النقابة؟… صح القانون بيفرض هيك، لكن واقع نقابتنا بيفرض أكتر، وبيطالب بأكتر من إلتزامات ماديّة… واقع نقابتنا الختيار بيطلب شروط جديدة للترشّح، من أهمّها: يعرف المرشّح للعضويّة هوي مرشّح للخدمة وللتضحيّة ومش لمركز وسلطة، وعشاوات وسهرات… مرشّح للتضحيّة والتعب، تعب جسديّ مداومة عالإجتماعات والمتابعات، تعب نفسيّ إصغاء للزملاء واحتياجاتن، تعب فكريّ بدك تنفض الغبار اللي متراكم وتلغي الصمت اللي مسيطر بالنقابة…. النقابة بدها تجديد، تجديد خدماتها، تجديد قانونها، تجديد أعمالها…. بدك تقيمها من زمن الإنحطاط والضعف وتصرخ بوجّ كل مين آكل حقوقها وحقوق المبدعين…
“يحق له أن يرشّح نفسه لعضويّة مجلس الإدارة “… نعم أيّها المبدع، إذا الشروط المطروحة قادر تحققها، تقدّم… واجعلوا من بكرا نهار إبداعيّ مميّز بتاريخ النقابة، هيدي الإنتخابات مفروض تكون نقطة تحوّل، نقطة تجدّد، نقطة إنطلاقة جديدة، بوابة عصر الأنوار بالنقابة، لأن إنتخابات بكرا لازم تكون أكبر بكتير من المادة سبعة… ما حدا يكون لامبالي، ولا حدا يكون متعصّب… عَ أمَل نشوف تجدّد وتطوّر بالنقابة… وهيدا التجدد إنتو بتفتتحوا بابو من بكرا الأحد… عَ أمَل يكون في أمَل …
