عملية اجهاض انعملت بس بسبب علاقة سريّة ومش شرعيّة، بحكم العمل بالوسط الفني والاعلامي، بيتعرض الاكترية لعلاقات مش انا بحكم عليها بس انتو بتعرفوها، ولا حتى بسمح لحالي احكم ع عملية الاجهاض، بس للأسف عم تتكرّر، لذلك كل الخبرية لنضوي سوا، ع كيفيّة اختيار العلاقات وبنيانها ومداها، وعلى أهمية الحدود العلائقية، مش اذا فنان(ة) او اعلامي يعني مفسّحلك ومحللك كل شي، مش عم احكي من باب الدين بل من باب الإنسانية، الاجهاض جريمة انسانية، النجومية مش اهم من انسانيتك، ولا الشهرة أهم من ضميرك، ولا المال أهم من روحك، حرّ بعلاقاتك، بس انتبه لحدودك وحدوها، وهالقضية بدها صلاة وشمعة من كل واحد منا … 

صرت استحي احكي بموضوع الاسامي، ومين بيجي اسمو قبل ومين بيجي اسمو بعد… بكل تقدير واحترام لكل اسم بالوسط الفني والاعلامي، وبعرف في مقام اسم وفي أقدمية، وفي اعمال بطولية… لكن كلن بيبقوا اسباب تحت قيمة الموهبة وقدرتها… الكل هلق تصوير وتقريبًا صرتوا بالمشاهد المتقدمة، وصار الكل حايص وين بدو يجي اسمو بالجنيريك… شو هالجدل اللي مش عم نقدر نتخطاه…

شو هالقضيّة اللي عم تجرنا ورا كل عمل لخلافات ما بتنتهي… حتى شو هالفكرة اللي ما بتحمل حتى مزح… بيبدا حديث تسلسل الاسامي بين فريق العمل بالمزح والنكته، بينتهي بكشرة او بخلاف…

ما بدي استعمل كلمة عقدة، بس شو هالازمة اللي بشكلها الاسم، واللي بيستعملها الشيطان كسبب سهل ليغلغل بيناتكن… يا خيي يا روحي، ليش مكان اسمك بالجينيريك هوي قوة ابداعك او انك تقنعني بدورك؟ أياه أهم انو ينحط اسمك اول اسم او تحفر اسمك بقلوب الناس والتاريخ ؟… صار لازم هالجدل ينتهي بيناتكن، لازم تلاقولوا حل، انا وعم استحي اكتب فكرة عنو، كيف قادرين تختلفوا بسببو؟…

مهم تلاقوا حل للاسماء، لكن الأفضل انو تتخطوا عقدة الاسماء … وهيدي التخطي خطوة اساسية نحو الابداع …

معقول؟ ما بصدق… معقول أشخاص يكون عندها مواهب متعددة ويكون مبدع بأعماله ونجم بنظر الكل وما يقدر يتخطى أسخف الخلافات… معقول مبدع بيكتب أهم الكلمات، بيقول أكبر حكم بأدواره، وما بيقدر يتخطى أقلّ الكلمات؟… معقول إنسان الله ميّزه عن الناس، وما بيقدر يتخطى ضعف الناس؟… معقول تنين زملاء مختلفين، نتلاقى بالصدفة ما تسلموا ع بعض؟… بعرف مختلفين، وزعلانين من بعض، ومبهدلين بعض، وهاينين بعض، بالشرف وبالكرامات… بس هلقد في حقد ؟ هلقد في كره ؟ هلقد بتحرز القضايا؟… اصلا بالاساس ع شو مختلفين ؟ مين أحلى ؟ مين أدوارو أحسن؟ مين بيقبض أكتر ؟ مين صف أول مين لأ ؟ أصلا ليش هودي كلن بصنفوك إنك مبدع ؟ ع كلٍ تصرف متل هيدا، انو ما تسلموا ع بعض، هدم كل أدواركن ونجوميتكن وشهرتكن… بدك تقلّي: نحن ناس وعنا ضعفنا… ايه انت من الناس بس غير الناس… ” انت في العالم ولست من العالم”… كل فنان في يكون مهندس، طبيب، استاذ، كهربجي، راهب … بس مش كل هودي فيهن يكونوا فنانين ومبدعين …. ترفّعوا عن سخافات المشاكل والخلافات… تصرف متل هيدا، هدم جسر من نجوميتكن، ودقّ مسمار بنعش رسالتي ..

ما بعرف شو معقول واحد يقول عن الدخلا اللي طاحشين ع الوسط الفني والاعلامي، يعني بدن يطيحوا بالزملاء المبدعين، ويسيطروا ع الاعمال بالقوة وبأي وسيلة ممكنة… عندك برامج الهواة اللي مفروض ينجح منها فنان وينطلق، بيطلع كل مين شارك بالبرنامج نجم، عداك عن مسابقات الجمال، وباقي البرامج، اللي بتصدرلنا كل سنة مجموعة ممثلين واعلاميين… بيغني ما بينجح، بصير يمثّل بيفشل، بقدم برامج أضعف، بدن يفرضوا حالن علينا بالقوة، وبدن يقنعونا انن موهوبين… وحتى مستعدين انو يتعرّوا بس يظهر بفيلم عراة بس ليحققوا شهرة… وتعا قلن يا خيي عيب، بقوموا عليك،وبصنّفوك قاتل الحريات ومهاجم المواهب… يا عيني، البعض فهمانين الفن غلط، لو بتتعرى انت والمدام والضيعة كلها، العري ما بيعني النجوميّة، مش نحن اللي بدنا نقتنع بمواهبك، انت بدك تقتنع انك مش موهوب، وما فيك تفرض حالك علينا، ولا مشاهدك، وسخافتك، وقلة التهذيب… ورجاء، للزملاء انتو ما تهنّوا وتشجعوا هيك اشخاص، ولا الصحافة تروّج لهيك اعمال ان كان بالمدح او بالنقد، لأن نحن كمشاهدين ما رح نقبل بقى بالاعمال المنحطة طول ما عنا اعمال مهمة وناجحة..

بقلم الأخت ناي خوري

عم اختبر للحظات قديه نحن بحاجة لدعم معنوي بحياتنا… دايمًا نحن ملهيين بالشغل والركض والتصوير والاعداد والكتابة… وع كترة الشغل والنجوميّة، صرنا منعدّ حالنا من أكبر الناس… وبالفعل منكون نحن عم ندخل بما يسمى الوحدة، ما بدنا حدا لا يشور علينا ولا يفهمنا ولا يوعظنا…

الشهرة والنجوميّة فيك تحققن بليلة، بعمل، بدور، بمقال، بس يمكن ما تكبر… لتكبر بدك ترافق الكبار، او منضل صغار… ما تكتفوا بذاتكن، يوم اللي بتكتفي فيه بذاتك اعرف انو انت عم تفشل…

انزلوا شوي عن عرش النجومية، وروحوا زوروا الكبار، الممثل، المخرج، يزور المبدعين الكبار، الاعلامي الصحافي الشعراء يتلاقوا بالادباء الكبار حاميين اللغة…

زيارتكن الن بتفيدك انت، هني مش بحاجة لمصرياتكن ولا بهمن، بس انت بحاجة لتتنشق خبرتن وعاطفتن وابداعن… روحوا زوروهن، صدقوني بزيدوكن ابداع ونجاح، بزيدوكن ايمان وأمل، صدقوني بكبروكن …

لتكبر بدك ترافق الكبار، والا بضل الصغير ولو كنت نجم كبير… 

بقلم الأخت ناي خوري

غريبين الأفكار اللي بتجي للبعض، ما بتستغرب التفنّن بالأعمال، بتعرف في مواهب بدها تتفجّر… بس بستغرب التفنّن بأعمال الشرّ، وبنخر العلاقات… بشرفكن خبروني من وين بتجي مواهب الأعمال الشريرة… مش عم بفهم هدف الحرب الجديدة اللي اصلا بلّشت من وقت بين الإذاعات وبيستعملوا سلاح الاعلاميين، بس تنتقل العدوى وتصير بالاعمال الدرامية، يعني شي غريب… كانت بلشت هالحرب الجديدة بين الاذاعات، برامج متشابهة، ذات الافكار، بنفس التوقيت، حتى وصلوا لدرجة يطلبوا من المونتاج يطلولوا المشهد، ليصيروا نفس وقت الدعايات، ونفس وقت المشاهد… حرب بين الاذاعات انطلقت وصارت مفتوحة، ويا مين يضرب اكتر… بس هلق خبروني، شو قصة سرقة الشخصيات من أعمال جديدة عم تتصور لتنعرض؟ كمان الدراما بالمواسم القادمة، بدها تهاجم بعضها؟ بدكن تعرضولنا ذات الفكرة؟ ذات الشخصيات؟ فلاحة بهيدا العمل، بدكن تسرقوا الفكرة وتحطوها بالعمل التاني؟ ذات الفكرة، ذات الشخصيات، ذات الوقت التاريخي، ذات التياب، ذات الدور؟… ليش؟.. وكمان نسيت، عم تتباحثوا لتنزل الاعمال بنفس التوقيت؟ يا برمضان يا برات رمضان؟ حسب هيداك العمل شو بيعمل مننزل ضدو؟… ليش عم تتواطئوا مع الاذاعات ضدّ الدراما، وهي كل مشكلة شرك الانتاج سببها تأخير الاذاعات بالدفع وتقليل الدفع… لشوا هالحرب الجديدة السخيفة؟ منسمّيها حرب سلميّة؟ هيدي مش منافسة، هيدي سخافة وضربة كبيرة للدراما اللبنانيّة والعربيّة… لشو؟ ما بيسوى ينعرضوا بتوقيت مغايير، ونحضر العملين ونفرح بنجاح التنين، وننبسط لتقدم الدراما، والصحافة تكتب عن التنين وتتغنى فيهن، مش احسن ما تنقسم الصحافة شي مع وشي ضدّ؟؟؟…. المنافسة الشريفة بتكون اللي بقدم حلو، التاني بيشتغل ليقدم الاحلى، مش بيسرقوا نفس الافكار والشخصيات، ونخلق بين الممثلين أحزاب… ونشغل صغار فرق الأعمال ليكونوا مخابرات بين العملين… بدك تكون الأقوى؟ كون الأفضل….

بقلم الأخت ناي خوري

لا ولن تخلو أرضنا من الصالحين الذين يقولون الحق ولا يخافوا… من يملك الحق ويريد أن يقولهُ، فليقف مواجهًا قويًّا غير مبالي بردات فعل الآخرين.. صاحب الحق يعلو صوته في النقاشات لأنّه صاحب الرأيي الصحيح والقلب السليم والنيّة الصافيّة، في حين يتوارى صاحب الحجة الضعيفة عن الأنظار ويختفي في خضمّ النقاش ويلجأ الى أساليب سخيفة وخفيّة… ومن هذه الأساليب التي نواجهها اليوم في مجتمعنا المتطوّر هي الصفحات الوهميّة على مواقع التواصل الإجتماعي التي يستعملونها بعض الزملاء تحت أسماء وهميّة مثل: ” Fans, Club، محبّي…” لا يزعجنا تحريك هذه الصفحات بداعي الشهرة والتعليقات للصفحات الأساسيّة للفنان… لكن ما نرفضه هو استعمال هذه الصفحات من أجل مهاجمة زملائهم وأعمالهم والتشهير بهم وكل ذلك بسبب مرض الغيرة والحسد القائم بين الزملاء… خُلقت مواقع التواصل الإجتماعي من أجل خلق العلاقات بين الناس، وزيادة التعارف وتبادل الثقافات والآراء… ولكن يبقى استعمالها قائم على كيفيّة استعمالها من المنتسبين إليها، التي تُترجم مستواهم الأخلاقي أولاً، والثقافي، والفكريّ، والحواريّ، والإجتماعي… لذلك، رجاءً، لا تختبأوا وراء صفحات وهميّة لتقولوا آرائكم مهما كانت جيّدة أو سيئة… من حقكم أن تبدوا رأيكم في أعمال بعضكم، فإن كان رأيك مبني على النقدّ الفنّي البنّاء الذي يساهم في تطوير الأعمال وتحسين المستوى الفكريّ والثقافي، فأعطهِ لزميلك بفطنة ومودّة فتزداد المحبة بينكما… لكن الذي يختفي وراء أسماء وهميّة ففي عمق أعماقه يعرف أن نقده غير بنّاء لا بل هو للنميمة والإساءة وفتح الحروب الكلاميّة بينه وبين زميله وبين محبّينه ومعجبينه… ويظهر الفرق واضح بين مستوى الكلام الأخلاقي في النقد الصريح والمباشر وبين النقد المخفيّ في أسماء وهميّة… وكلٌّ منا يختار مستوى احترام الآخرين له عبر اختياره طريقته النقديّة لزميله… إذا كان إختيارك صحيح وصريح، ستربح زميلك وتساهم في رفع الأعمال… وفي حال إختيارك كان الوهميّة، عندها لا تلوموا ردات فعل الزملاء وخاصة الصريحين منهم، والمتصالحين مع ذواتهم…. انتبهوا لفعلكم قبل أن تُظهروا أنفسكم مظلومين من ردات فعلهم…

بقلم الأخت ناي خوري

في دولة فساد، بدون رئيس، مع حكومة تصريف أعمال ونواب يمدّدون لأنفسهم، في غياب المراقبة والمحاسبة، مع نقابات نائمة ووزرات تحتضر… سياسيّون يتحاربون ورأسماليون يسرقون…

نحن أبناء الفن والثقافة، لن نتكلّم عن السياسة وفسادها، لكن لن نسكت عن رأسماليين يسرقون مواهب مبدعينا الفنيّين وخاصةً في المجال التمثيليّ والإخراجيّ… رأسماليين أعطتهم الكنيسة بتعاليمها شرف تسميّة “منتجين”، “لا بدّ من التزام رصين ومتواصل من قبل المنتجين، من أجل انجاز عمل صالح وبنّاء…”(اليوم العالمي ٢٧ للإعلام ١٩٩٣)… عن أيّ صلاح نتكلّم و أيّ عملٍ بنّاء سيصدر عن الانحطاط الأخلاقي في العلاقات بين ” بعض ” المنتجين والزملاء الممثلين والمخرجين وكل فريق عمل فنيّ…
في غياب الدولة والوزارة والنقابات، نضطّر للمطالبة بحقوق الزملاء، حقوقهم الماديّة بعد كلّ عمل يتمّونه… ولكن للأسف اذ نتفاجئ بالأيام الأخيرة، أن سبب حزن الزملاء ليس سببًا ماديًّا، انما هو المستوى الأخلاقيّ المعتمد في حديث الرأسماليين في حديثهم مع الزملاء، المبنيّ على التكبّر والإستهزاء والإهانة…
لا أحد ينكر عملكم الجيّد في توظيف أموالكم في الوسط الفنيّ والإعلامي، ولكن هذا لا يعطيكم الصلاحيّة لتسخير مواهب الزملاء من أجل نجاح أعمالكم وأنتم تتقاسموا أرباحها مع مدراء الاذاعات… اعلموا أنّ زملائنا ليسوا ” شحّادين” كما تنعتوهم كلّما طالبوا بحقّهم الماديّ، فهذه أدنى حقوقهم وأنتم ملزومون في اعطائهم… اعلموا أنّ المستوى الأخلاقي المتدنّي يمكنكم أن تخاطبوا فقط أنفسكم به، وتدرّبوا على الاحترام والأخلاق من أجل التحدّث مع المبدعين… اعلموا أن المبدعين ليسوا كالدخلاء الذين يقدّمون لكم تنازلات من اجل إرضائكم وشراء دور بطولة في أعمالكم، المبدعين يعطونكم أغنى ما عندهم لتغتنوا أنتم وتردّوا مدفوعاتكم أضعاف، فلا يحقّ لكم أن تسرقوا مواهبهم، ووقتهم، وتعبهم… وأن تتمتّعوا بنجاح السرقة كلٌ على يختِهِ، في حين تحرمون الزملاء من قطف نتاج أعمالهم وتعبهم الذي ينتظرونه من أجل تسديد ديون مدارس أولادهم وجامعاتهم، وتأمين العيش بكرامة لهم ولعائلتهم…
فليكن معلومًا أنّ هذا المقال هو للفت النظر من أجل تحسين المسار في العلاقات بين المنتجين والزملاء المبدعين، وأن نرجع لتعليم الكنيسة وليعلم كلٌّ واجبه وصلاحياته وأهميّة رسالته، ومعرفة أن مصدر الإبداع هو واحد، واحد فقط، هو الله المبدع الأوّل، والكلّ متساوي في خدمة الجمال – الخير، ولا أحد عبدٌ لأحد، ولا ممثل عبد لمنتج، ولا منتج عبد للمال…
وليلزم كلٌّ حدوده القانونيّة والماديّة والأخلاقيّة أيضًا… وحذارِ من اهانة مبدعينا…

بقلم الأخت ناي خوري

العوافي…

كذبة كبيرة اخترعوها والأكتريّة صدقوها… ” الفنان مِلك الناس”، عقيدة فرضوها على المبدعين ولزموهن فيها، وصَفّت حياتن العلنيّة والخاصة موضوع تناقش وإنتقاد مين ما كان ببلّ إيدو فيه… لأ وألف لأ لكل يلّي بآمنوا بهالعقيدة إبتداءً من الصحافة والإعلام إنتهاءً بثرثرات الناس…
بدرجة أولى، المبدع ليس ملك حدا، هو مِلك ذاتو… اذا كلّ واحد منا بيعتبر حالو من مكانو عم ينمى ويثمر بالأرض(تك ١: ٢٨) ليكون إستمراريّة لخلق الله، فالمبدع هويّ إستمراريّة لله ذاتو بإبداعه ومواهبه… بمعنى آخر، المبدع مِلك الله وحده…
بدرجة تانيّة، الصحافة والإعلام والثرثرات لها عالمبدع بأعماله ونشطاته… كل واجب الصحافة إنها تنقل أخبار المبدع للجمهور، ومقابلاته وأحاديثه، وبرامجه، وتصريحاته… من أسوأ الأدوار اللي بتلعبها الصحافة والإعلام لما بتدخل على حياة المبدع الشخصيّة، وهيدا طلّق، وهيدا تجوّز، وهيدا أكل وهيدا شرب… وبصير تحليل للمشاكل وأسبابها وتلعب دور الطبيب النفسيّ والمساعد الإجتماعي… والأسوء لما تستفيد من الخبريّة وتستعملها سكوب لصفحتها أو تقريرها… وبصير في سباق صحفي وإعلامي على مين بينشر الخبر قبل التاني… المبدع عم يعطي كلّ حياتو، كلّ عمرو للمجتمع وللناس وللإعلام، لكن بحقّلو يترك مساحة خاصة حميميّة لذاتو… من حقّو يكون عندو خصوصيّة ومن واجباتك تحترمها وما تتخطّيها…
المبدع منّو مِلك الناس، وخصوصيته مقدّسة، ما فيك تجعل من مساحته الخاصة الحميميّة مساحة عمياء، اللي هي مساحة الجَهل، الكلّ إلو فيها… المبدع حياتو ليست ملك عام بتنوضَع بمختبر الصحافة وأحاديث الصالونات وبشَّرحوها وبحلّلوها… إنتبهوا، كلّ مرّة بتخرقوا خصوصيّة المبدع بالقوّة بتكونوا عم تجرحوا، والجرح بيألّم صاحبو فقط، بحين إنتو عم تتسلّوا بالحكي… فرق كتير كبير بين كشف الذات وبين فضح الأخبار… كشف الذات هوي قرار ذاتيّ وحرّ، اذا راد المبدع إنو يكشف ذاتو وخصوصيته لجمهوره، بيكون قراره الشخصيّ، لكن فضح الأخبار هوي وقاحة تخطّي حدود المساحة الشخصيّة…
اذا الله بذاتو بيحترم خصوصيّة كلّ واحد منا، وعاطيه الحريّة حتى بعلاقتو معو، وبقلّك: “أنا واقف عالباب أقرع، اذا فتحتلي، بدخل وبتعشّى معك (رؤية ٣: ٢٠)”… مين إنت لتتطفّل على حياة المبدع وتدخل عليها وتفرض نفسك ورأيك وسلطتك، تحت خبريّة إنو المبدع مِلك الناس؟؟…
صحافة وإعلام وجمهور، صحّحوا معلوماتكن، حياة المبدعين مِلك لهم وحدن، وحياتن الفنيّة والعمليّة مِلك لتقاريركن وإنتقادكن وكلام الجمهور… ما بقى يحمل البلد حكي وتفاهات، وقيل وقال، بعد في هالشويّة فنّ وإبداع، ساهموا بدعم المبدع ليوصّل الصورة الحلوة عن لبنان… ما بقى في شي تحكو عن البلد وتظهروا للعالم، سهوله وجباله أكلتن الكسّارات، طرقاته وساحاته حتلّتن النفايات، قصر بعبدا فاضي، والبرلمان نسيوا بابه، والحكومة مافيات، وشعبه يا مهاجر يا جوعان… ما بقى في شي تحكو عنو، غير الأصوات الحلوة والطرب، والممثلين ومواهبن، والمخرجين وإبداعن، ساهموا بنشر رسالتن، دعموا تعبن، وما تتلهّوا بخصوصياتن…
حرّروا حريّة المبدعين، حرّروا خصوصياتن من تقاريركن، حرّروهن من تطفّلكن وسيطرتكن… صدّقوني، بالعربي الصريح، بعد القديسين والمبدعين، ما في لبنان…